中環出更：CY台上致詞鬍鬚曾台下瞌眼瞓
仲未講明會否角逐連任嘅特首梁振英（CY），同盛傳有意挑戰CY參選特首嘅財政司司長曾俊華（鬍鬚曾），近日喺多個場合一齊現身，但被指貌合神離，而喺最近嘅橫洲發展爭議中，兩人更公然互相卸責。尋日兩人一同出席智經研究中心成立十周年晚宴，CY喺台上致詞時，身為下屬嘅鬍鬚曾竟然喺台下公然瞌眼瞓「釣魚」，令人質疑現屆政府管治團隊已經散散哋！
五分鐘後先回魂
話說CY喺致詞中大談土地問題，負責特區土地供應政策嘅鬍鬚曾，聽咗大約十分鐘就開始瞌眼瞓，並一度瞓到個頭搖吓搖吓，打晒圈咁，實在令在場人士側目。佢大約瞌咗五分鐘先至回魂醒番，喺散場離開時更加成個精神晒。
與此同時，好耐無出過聲嘅行政會議召集人林煥光，尋日出席一項青年活動致詞時，突然大談領袖嘅應有條件，強調誠信必定排第一。佢又指無論小至學生領袖，或大至特區之首，都必須負責任及有關愛之心，若果只着重自己嘅名譽同前途，遲早會被人看穿，下屬亦不會追隨自己，最終肯定唔會成功。不過，佢強調並非針對CY喎，真係信不信由你。
卓妮