中環出更：「運」用奇招藝術珠寶迸火花
全球經濟持續探底，屬高端消費嘅珠寶業界冷暖自知，惟有各出奇謀搵商機。好橋多多嘅古珀行珠寶總裁沈運龍（Aaron）就趁全球最大嘅珠寶首飾展舉行期間，搵國際知名珠寶設計師及鑽石畫家Reena Ahluwalia來港，展示佢拿手嘅鑽石畫作，希望為沉悶嘅市場製造些少驚喜。做珠寶批發生意嘅胡良利珠寶第五代傳人胡劍江（Michael），就洞悉先機搞網上交易平台，希望捱得住呢輪經濟寒冬。
Aaron話，佢之前已經嘗試過珠寶同音樂合作，造咗兩把健力士結他，今次就試吓同藝術結合。Reena係英國王冠設計者，藝術造詣高，遲啲Reena會以古珀行嘅專利冠玲瓏設計鑽飾系列，希望雙方擦出火花。
胡劍江力保優勢
雖然話市道差，但係卓妮見胡良利珠寶攤位人頭湧湧，生意好旺，啱啱接任潮州商會會長嘅Michael都親自落場招呼買家。Michael笑笑口話，佢哋做批發生意，優勢係貨源多，現貨數以噸計，加上十幾年前已開始做網上珠寶交易平台，廿四小時接單，交貨快，連大型連鎖珠寶店都係佢哋嘅客戶添！
美億珠寶董事長王淑筠亦有參展，佢話市場差始終要靠設計取勝，例如中東市場唔錯，佢就喺設計上投其所好。
王淑筠指中東婦女經常着長袍、包頭巾，故此特別鍾意大大件嘅首飾，今次佢哋就推出狀似水晶吊燈嘅耳環系列，望落又真係好有特色。
卓妮