有人形容手機嘅發明係當代一場通訊革命，查實手機唔單止係通訊革命，仲可以係「武器革命」。好似最近推出嗰款外國名廠旗艦手機咁吖，爆完一鑊又一鑊，搞到人見人怕，卒之咪要全面回收囉。
當然喇，人哋話晒都係有頭有面嘅大品牌，始終都會自珍羽毛，消費者出咗事都容易啲追究，其他山寨手機產品就唔同講法嘞，好似時下最流行嘅多頭USB充電器咁，本報記者喺市面抽查三款廉價樣本，交畀大學電機工程系做測試，結果發現問題多多︰明明有六個插頭，點知插到第四個時電壓跌至零度，明顯貨不對辦；咁都唔止，全部樣本充電時溫度都超過攝氏四十度，有樣本甚至高達五十度，再加上充電器電極未被絕緣體包好，用家灼傷事小，觸電甚至起火爆炸先至大鑊！
話時話，USB充電器危機四伏，唔係今時今日嘅事。消委會兩年前已經聯同機電工程署抽查市面上二十款USB充電器，發現七成樣本未能通過所有安全測試，其中就包括絕緣距離不足等問題。當局明知呢類充電器有問題，仲任由賣通街，仲有冇再不負責任啲吖！
係人都知，今時今日一個二個都係低頭族，上社交網站、影相、發短訊甚至捉精靈，通通都離唔開一部手機，對於相關產品嘅安全監管，再嚴謹啲都唔過分，可惜事實啱啱相反，山寨USB充電器固然無王管，幾乎人手一部嘅充電「尿袋」，同樣係放任自流，話就話納入《消費品安全條例》同《商品說明條例》規管，但咁耐以嚟幾乎未聽過海關執法拉人，唔怪得周不時都有尿袋喺港鐵車廂爆炸。前排之嘛，又有國產尿袋充充吓電冒煙起火，一家四口幾乎葬身火海，唔通港產官僚真係要等到死人冧樓至肯做嘢？
正所謂一節見則百節知，港產官僚產品安全監管落後於時代，手機產品只係冰山一角。電動車喺內地大行其道，但質素良莠不齊，深圳就曾發生劣質充電器引發嘅奪命大火，當局任由呢類電動車喺香港通街走，甚至透過網購直接送到府上，出事只係遲早問題。又例如無人航拍機，一早被證明可被用作恐怖襲擊工具，美國、日本等地與時俱進，立例規管，反觀香港，仍然將無人機當作遙控飛機一類嘅「玩具」看待，你話係咪嘥氣吖！
難為官老爺開口埋口民生無小事，產品安全關乎市民安全，大安旨意，關人個關，同草菅人命冇乜分別。港府大事唔識做，小事做唔好，ABC成為選舉「賣座保證」，依家知點解喇！