環保組織綠色和平最近發表報告指出，全世界每秒鐘有逾二百公斤塑料被傾倒入海，累計每年有超過八百萬噸塑料留在海中。該組織呼籲各國相關機構採取措施，解決在海洋和陸地環境中不當處理和丟棄塑料廢物的現象。老朽不禁想起梁振英早前親率多位局長及官員去大嶼山參與清潔海岸行動，但見佢在沙灘努力執垃圾，為香港海岸生態出盡洪荒之力，自己沙灘自己救，令人霎那動容！佢又話將與粵政府跟進垃圾湧港問題，不過睇嚟又係講咗當做咗。
不是嗎？日前有漁民向漁民聯會求助，指本港對出的伶仃島及萬山群島一帶，淪為內地垃圾堆填區，漁船傳統作業水域被大量垃圾攻陷，搞到佢哋冇啖好食，撒下魚網，撈起嘅垃圾多過魚，認真冇癮。漁民稱，近月嘅魚獲較去年同期銳減一半。看來ＣＹ未能與內地有效溝通，反而內地公安加強監察，不久前更截獲一艘運載逾百噸垃圾的貨船，企圖出海傾倒垃圾。
老朽極希望梁振英再次率領環境局局長黃錦星去沙灘執垃圾，一來示範何謂「可持續發展」；二來可帶出正面訊息：凡事都要持之以恒；三來可顯示高官齊心協力，說不定有助競選連任。
ＣＹ陸地冇路行，連擺張櫈、拎支筆、攞張紙都有難度，今登高望遠，向海洋發展，說不定在沙灘執垃圾反而悟出個未來。唐人小說《虬髯客傳》寫虬髯客見李世民「精采驚人」，知道自己同佢冇得揮，要另覓他處或可稱王，於是嘆口氣就走了。老朽眼見香港樓價已非我所能負擔，於是亦悟道：此生把房子蓋在海上，所以，注定一生飄泊！想通了，也就不怪冇神經政府未能遏止樓價狂升。ＣＹ陸路擺張櫈都難，一於向老朽學習，航向大海，江上清風與山間明月，取之無禁，用之不竭。