政情：另類玄機 5 8大贏家 衰11冇運行
選情激烈嘅立法會選舉尋日揭盅，結果梗係有人歡喜有人愁。想贏呢場仗，除咗講實力及點打組織戰之外，候選人嘅號碼似乎亦暗藏勝敗玄機。不過咁，候選人嘅名單號碼係被抽嘅，自己冇得揀心儀嘅冧巴。細心分析當選名單，最幸運嘅號碼非五及八號莫屬，喺五個地區直選中，抽中呢兩個冧巴嘅候選人各有四人得咗。最邪嘅係十一號，五人喺五區全軍覆沒，唔通真係冥冥之中一切有主宰？
麥嘉晉譚國僑未獲眷顧
香港人一向喜歡八號，因為八與「發」字讀音相似。今次選舉中，八號不負眾望，包括香港島羅冠聰、九龍東胡志偉、九龍西黃碧雲及新界西何君堯都幸運抽中八號，亦成功當選，唯獨新界東八號候選人麥嘉晉落敗，唔知佢係咪同八號唔夾呢？
今次選舉五號候選人表現亦唔差，五個地區直選中有四個勝出，包括香港島張國鈞、九龍東謝偉俊、新界西鄭松泰及新界東梁國雄（長毛），只有九龍西譚國僑得個「吉」。其中長毛呢一仗贏得十分驚險，爭啲輸畀方國珊，長毛仲一度做咗敗選準備。選情咁戲劇化，唔通真係抽中靚冧巴救咗長毛一命？
數完幸運號碼，再數吓最唔好彩嘅數字，其中最邪係十一號。喺五個地區直選當中，十一號候選人全部落選，包括香港島徐子見、九龍東陳澤滔、九龍西關新偉、新界西黃浩銘及新界東侯志強，認真係「衰十一」嘞！
梁耀忠兩「發」護體過關
講開地區直選，又講吓超級區議會選舉結果。超級區議會候選人嘅冧巴都有三個數字，全部八字開頭，其中八○八號梁耀忠有兩個「發」字罩住，結果真係喺激戰中勝出。不過，八○五號陳琬琛就算有齊五同八，但係選前喺棄保效應中成為犧牲者，結果都係同議席有緣冇分，唔通兩個靚號碼放埋一齊相沖嘅？所以話，數字嘅嘢，真係信不信由你。