中環出更：沈祖堯：中大唔贊成港獨

香港中文大學尋日舉行本科生入學典禮，校長沈祖堯回應港獨議題時話，法治係香港重要基石，喺《基本法》訂明下，香港係中國不可分割嘅一部分，所以中大唔贊成港獨。不過沈祖堯言論立即受到學生「挑機」，中大學生會會長周豎峰指校方唔應該喺敏感時刻，發表火上加油言論，亦有新生認為校方應該保持政治中立。

近期大專學校陸續開學，繼香港大學校長馬斐森喺開學禮指港獨不符大學利益後，沈祖堯尋日亦被問及此問題。佢強調，學生及教職員喺校園內有自由就唔同議題進行討論，但亦應為自己言論負責。至於學生可唔可以喺校園派發港獨宣傳品，校方會唔會因學生涉及港獨議題而報警，沈稱需視乎情況而定。

周豎峰回應沈祖堯言論時話，當法律不再符合人民福祉時，人民就有權修改，故香港前途不應被《基本法》束縛。佢批評校方不應喺呢個敏感時刻火上加油，揚言稍後會視乎人手及時間，積極考慮舉辦有關港獨議題嘅論壇。有理學院新生指周豎峰言論屬個人意見，但他認為學生可私下討論港獨，學校宜保持政治中立。

此外，理工大學尋日亦發出聲明，強調基於《基本法》原則，理大唔贊同港獨。

卓妮