中環出更：公大教學室命名 廠商會成員捧場
香港公開大學日前獲香港中華廠商聯合會（廠商會）捐款設立獎學金，用於支持及獎勵成績優異嘅檢測和認證課程全日制學生，希望培養更多有關方面嘅人才。卓妮見公開大學校長黃玉山與廠商會會董羅台秦（Louisa）非常啱傾，原來兩人以前係科技大學嘅舊同事，當年佢哋仲係同一日報到返工添！
Louisa話，當年科大啱啱創校，學院唔係好大，所以就算大家教唔同科目都會經常碰面。佢印象最深刻莫過於當年成日被同事笑佢廣東話咬字唔正，有台灣口音。有一次舉辦一個論壇，當時有北京人參加，同事就笑言，淨係聽得明Louisa講嘅廣東話，反而聽唔清其他人講喎！
當日公開大學舉行「香港中華廠商聯合會教學室」命名典禮，以感謝廠商會嘅慷慨捐助，一班廠商會成員都去見證，包括廠商會副會長陳淑玲（Shirley）、吳永嘉、徐炳光、徐晉暉、吳清煥、吳宏斌及史立德等人。
陳淑玲盼培育新血入行
一行人參觀咗一轉校園，吳永嘉諗起大學時光，話當時學校冇咁多唔同用途嘅教學室，佢通常習慣去圖書館溫書，但每逢考試前兩個月圖書館必爆，一定要晨早去排隊先有位。
佢哋亦參觀電機及電子測試實驗室，實驗室主任更向經營製衣生意嘅Shirley介紹檢查衣物物料係咪防UV嘅機器，開正佢嗰瓣。Shirley話，產品檢測及認證對於廠商好重要，所以希望捐助公大可以培育更多新血投身相關行業，造福業界。
卓妮