開講有話，人溺己溺，人飢己飢，不嬲係安全城市嘅新加坡最近好似撞咗邪，早前成為恐襲目標，近日又被寨卡病毒攻陷，仲四周圍不斷蔓延添，香港雖然暫時安全，但冇人知幾時會淪陷o架！
講開新加坡寨卡疫情，短短一星期就錄得超過二百宗個案，傳播力認真驚人。話口未完，新加坡鄰國馬來西亞出現首宗本地感染個案，而菲律賓、越南、泰國等一早失守，內地及台灣都有個案，香港家陣雖然未爆發本地個案，只係暫時好彩嘅咋。你知喇，唔少港人鍾意到東南亞旅遊，加上香港作為國際航空樞紐，睇怕都幾難獨善其身，連港府都承認本港新增寨卡病例可能性好高，唔怪得大部分「東方報業民意調查」受訪者都表示，擔心寨卡病毒進入社區後，會喺香港植根喇。
市民嘅擔心絕對唔係多餘，寨卡病毒攻城掠地，按道理港府應該如臨大敵，嚴防死守，實際啱啱相反，大家有眼睇，美國、澳洲以及台灣等地一早對新加坡發出旅遊警示，唯獨港府拖拖拉拉，遲遲至發出黃色外遊警示，令人無所適從。家陣馬來西亞出事，食物及衞生局局長高永文又係滋油淡定，話會密切留意當地疫情發展。咁即係點？即係袖手旁觀，坐以待斃咯。
冇錯，港府曾召開跨部門會議，話要加強對高危孕婦檢疫工作同埋加強滅蚊，但其實只係得把口。就講最簡單嘅口岸防疫，港府並無提高機場等地把關級別，連要求高危地區旅客填寫健康申報都慳番，同開門揖疫冇咩分別。當年沙士害到香港雞毛鴨血，就係因為放行一名廣州帶菌者過關；家陣內地已證實多宗寨卡病毒外來個案，部分人曾過境本港，悲劇隨時重演。大部分受訪者批評港府防疫被動、鬆懈，整個香港猶如無掩雞籠，明顯唔係無的放矢。
最令人非議嘅係，本港近日出現首宗確認傳入寨卡個案，點不知患者喺公立醫院隔離一晚後，第日當局閃電放人，話檢測已呈陰性喎，你話幾兒戲吖。查實好多地方規定患者要驗血驗尿確定冇事至准出院，港府檢測咁求其，講出嚟都冇人信。
至於講到滅蚊咯喎，更加係甩甩漏漏，結果搞到蚊患處處，唔係日本腦炎連環爆，就係登革熱成為風土病，家陣寨卡病毒兵臨城下，一旦出現本土感染個案，蚊患就會成為疫情迅速蔓延嘅媒介。
唉，家陣香港七國咁亂，港府施政無能，政客政治掛帥，根本無人關心民生問題，亦無幾多人關心寨卡疫情，喺呢個時候再爆疫症，分分鐘大鑊過沙士多多聲！