政情：胡曉明食椒 辣親自己
近年唔少以辣聞名嘅川菜、湘菜館進軍香港，但都要刻意減辣以遷就香港人。城市大學校董會主席胡曉明（Herman）係上海人，但佢好鍾意食辣嘢，講起各地唔同嘅辣，仲好似食神上身咁。
最愛湖南菜
Herman特別鍾意湖南菜，形容菜式多姿多彩，好有特色，例如名菜「剁椒魚頭」。佢自爆曾經挑戰過炒指天椒，以為自己食到，點知被辣親，所以湘菜出名嘅「辣椒炒辣椒」佢就唔敢亂試喇！Herman又細數中國人各地唔同嘅辣，其中最鍾意重慶嘅麻辣，特別齒頰留香。雖然佢無辣不歡，但佢太太唔食辣，所以佢都係適可而止，間中都食番上海菜。
唔講唔知，原來Herman真係食家，事關早幾年佢入股一間歷史悠久嘅飲食集團，依家旗下有四十幾間餐廳，包括西班牙、德國、泰國及中菜等餐廳，難怪佢講起食經成個專家咁款喇！