政情：白鴿黨內訌 謝正楓離巢

舊年區選前夕 七人退黨

白鴿黨喺新界東一直風雨飄搖，多年來屢爆退黨潮，舊年年底區議會選舉前夕，沙田區議員麥潤培等共七人就拉隊退黨。而卿姐卸任立法會議員一職，由阿廷接棒，早已引起部分黨員不滿。有消息話，同阿廷一齊搞反圍標工作嘅莊榮輝近日率先空降接管卿姐議辦，架空卿姐議辦嘅同事，仲大數卿姐議辦同事不是，令到卿姐議辦同事極之不滿，接近罷工狀態。而莊榮輝此舉仲得罪咗黨內包括沙田、西貢、將軍澳在內嘅地區樁腳，其中謝正楓更決定退黨。

無事值得留低 去意已決

謝正楓日前喺社交網站上留言︰「今日且別，昐（盼）情誼不變，繼續在路上並肩前行……」退意甚濃。他尋日承認，早兩日已經向黨中央遞交退黨信，但未有回音。佢話五年前由卿姐邀請入黨，過去五年一直有同卿姐共事，依家擔任區議員，想專注地區民生事務，兼顧唔到太多政黨事務，加上卿姐唔做立法會議員，佢喺黨內已經無任何事情值得留低，所以決定退黨。

被問到係咪因為不滿莊榮輝架空卿姐議辦及同事而退黨，謝正楓淨係話聽過有關傳聞，又指立法會候選人應該同地區樁腳溝通及協調得好啲，但佢就話唔方便講咁多喇，強調退黨同黨內人事問題及政治立場無關，亦都希望之後可以繼續同泛民主派合作喎。莊榮輝就回應話，有關指控並非事實，指有人炒作，他話好少接觸卿姐議辦同事，強調呢世人只喺卿姐議辦逗留過兩小時。

正所謂空穴來風，未必無因，自從阿廷獲白鴿黨重點栽培、上位及接棒後，確實出現好多風風雨雨，即使有天時、地利，但無人和，恐怕遲早只會眾叛親離。