中環出更：陳健波遊瑞士 洗滌埋個肺
近年好流行一個人出走旅行，自動當選保險界立法會議員嘅陳健波都有樣學樣，暑假一支公去咗瑞士旅行。佢形容瑞士空氣真係好好，同香港、北京真係無得比。難怪佢去完旅行返港後容光煥發，睇嚟唔止洗滌心靈，仲洗滌埋個肺添！
陳健波話，今次旅程主要係去行山及睇冰川，喺冰川影相時，會有好多差唔多拳頭咁大嘅碎石隨住融雪跌落嚟，所以佢影相時特別緊張，要把握好時間，同埋要用雙手保護自己個頭，否則實中頭獎。
旅行餐餐食三文治
去完旅行正常應該會心廣體胖，但陳健波就話去完旅行上磅發現得一百四十幾磅，比起以往磅數維持一百五十幾磅仲瘦咗，因為旅行期間都只係食簡單嘅三文治。佢仲話，喺立法會開大會時，秘書處會為議員提供自助午膳，由於食物太好味，以致經常都食多咗，特別係最鍾意食紅豆沙，一次可以食三至四碗，搞到肥咗五、六磅，所以近兩年決定唔再食自助午膳喇。
卓妮