中環出更：靚車雲集 超跑迷盼組港隊
由城中一班超級跑車愛好者創辦嘅「M超跑會」早前舉行成立晚宴，近百名社會名流都去湊熱鬧。雖然香港冇正式賽車場地，但愛好跑車及賽車嘅人與日俱增，「M超跑會」創辦人兼主席馬仁威（Kelvin）就話，下年主要任務係組織一隊真正屬於香港人嘅車隊，藉此推動賽車活動及培訓新一代本地年輕賽車手，為香港爭光。
話明係超跑會，梗係個個都係跑車迷。家族有份創辦九巴嘅人頭馬協祥公司私人客戶總監雷凱竣（Nathan）都在場，佢亦係「M超跑會」嘅共同創辦人。Nathan話，佢哋共有十幾個創辦人，個個至少擁有一架瑪莎拉蒂、林寶堅尼等意大利跑車，大家差唔多每星期都會開跑車聚會，有時試吓車，有時歎美食，名副其實係志同道合嘅老友。
意式生活 人人嚮往
同場仲有馬會大董鄭維志、仁濟醫院前主席林煒珊、香港鐘表業總會前主席陳正欣夫婦及周大福珠寶董事總經理黃紹基等政商界名人，意大利駐港澳總領事Antonello De Riu夫婦亦有出席。一班咁識享受生活嘅名人相聚，話題自然離不開遊艇、時裝及美食，大家咁啱都好嚮往意大利式生活品味。
Kelvin太太黃迪茵話，最羨慕意大利人悠閒嘅生活步伐，淨係歎咖啡都幾個鐘。當晚有豐富嘅抽獎環節，身家逾百億嘅寶聲集團董事長陳耀璋抽到免費學意大利文課程，佢笑言學識後要拉隊去意國旅行喎！
卓妮