欄商斥消防無第一時間撲救
【本報訊】果欄昨日火燒連環舖，欄商蕭先生怒轟消防員到場後只顧住「攞料」，未有第一時間開喉灌救，不諱言：「消防攞料都攞咗兩、三個字，但啲火已燒到嘭嘭聲！」消防救火期間，其中一條消防喉被車輾爆，目擊者質疑「爆喉」影響灌救，令火勢遲遲未受控。由於果欄店舖相連，多間店舖被烈火吞噬，水果付之一炬，有欄商慶幸中秋節貴價水果未到，否則損失更慘重。
女欄商衝入火場救出愛犬
火警中見人狗情深，有女欄商奮不顧身衝入火場救出愛犬，另一名欄商甘先生聞火警後即時趕回果欄，圖救飼養十多年的愛犬「Mimi」，惟因火場被封遭警方阻止，他和家人擔憂不已，坦言：「生果冇咗都唔緊要，最重要係佢走得甩，希望佢冇事喇！」幸Mimi最終被發現藏身枱底，安然無恙，甘先生人狗團圓開心不已，不禁大呼：「唔見咗啲錢同貨都冇問題，最緊要佢冇事！」
消防喉遭輾爆 水湧路面
消防員救火期間發生「爆喉」插曲，在渡船街窩打老道交界附近的一條消防喉，昨午五時許，有市民目擊一輛車將喉輾爆，水湧至路面。消防發言人回應時稱，現場的確曾有消防喉爆開，但已由消防員即時進行補救措施，未有影響到救援工作。
