政情：今日你上鏡：龐愛蘭男鞋前變渺小

沙田區議員龐愛蘭（Scarlett）日前喺社交網站上載咗一張自己坐喺巨型男士皮鞋前嘅相，莫非Scarlett都係「鞋癡」﹖Scarlett就話，張相係去年八月喺菲律賓Marikina City出席健康城市聯盟會議時影嘅，該市又被稱為Shoe city（鞋之城），留影嘅地方係當地一個展覽場地。本身係聯盟西太平洋區主席嘅Scarlett嚟緊亦會去韓國原州市出席今屆聯盟會議，佢仲特登搵人將開幕演詞頭幾句翻譯做韓文，依家努力練習緊，希望屆時可以派上用場喎。佢又話，原州市紙製品好出名，甚至有用紙造嘅衫同床單，佢會預留時間參觀。