小清新本嚟係指一種清新唯美嘅音樂，其後漸漸變成青春同活力嘅代名詞。如果問現今內地模特兒當中，有邊位能夠配得上小清新呢三個字嘅話，王淼絕對係其中一位，其清新氣質加上純情形象，令每個人都會被佢嘅魅力所感染。
出生於天津，今年24歲嘅王淼，英文名Angel，佢仲有個相當可愛嘅網名「淼淼萌萌噠」，自稱可愛控嘅佢，最愛展現自己可愛嘅一面。不過講到氣質，畢業於天津師範大學文學院嘅佢，散發出一股書卷味，配合埋純情氣質，如此斯文又優雅嘅魅力，喺芸芸寫真模特兒中相當少見，難怪佢被冠以「小清新」嘅稱號，同時喺模特兒界佔一席位。
不過大家咪以為佢只係憑住氣質取勝，事實上佢嘅身材亦好有睇頭，喺寫真中佢大方地展示玲瓏浮凸嘅身段，極具吸引力。雖然佢出道日子短，但係演出經驗豐富，事關佢最初以車模身份喺各個大型車展亮相，同時佢又經常為時裝、化妝品及汽車等雜誌擔任模特兒，當然唔少得喺各種商品展銷會中登場，難怪家陣佢進軍寫真界，面對鏡頭時顯得淡定又自然。
可能因為佢演出經驗豐富，亦慣於面對群眾關係，所以培養出超強自信，否則試問有幾多個寫真模特兒敢喺微博上分享素顏照呢？事實上佢對自己嘅樣貌相當有自信，尤其係挺直嘅鼻樑，難怪佢啱啱瞓醒嘅素顏照都唔怕公開畀人睇啦！雖然佢對自己嘅樣子感到自豪，但係仍有一啲地方令佢覺得唔滿意，就係略胖嘅身材。原來阿妹喺今年6月時休息咗一段時間，期間佢經常同朋友周圍品嘗美食，試過一日之內食咗6餐，結果搞到條腰粗咗囉。為咗Keep Fit，佢花咗7個月時間減肥，至於用乜嘢減肥方法佢就冇講，只係叫大家留意佢嘅最新寫真集就會睇到鍛煉嘅成果。除咗積極喺寫真界發展外，佢亦努力做網上生意，自己做埋生招牌推銷化妝品，佢表示凡事要求嚴謹，每樣產品都經過試用後才推介畀大家，所以可以放心喎！
簡介：王淼嘅陽光魅力可以從其寫真中感受得到，而從其微博亦可以睇得出阿妹嘅性格十分樂天，佢話：「心若陽光，何處不晴天。」如果大家想了解佢多啲，就要成為佢嘅微博粉絲喇。
網址：http://www.weibo.com/wangmiaosmile?is_hot=1
出生地：天津
身 高：173cm
三 圍：34、24、34
撰文：魂