政情：碧樺依唔夠瞓 做女神靠飲水
香港人唔夠瞓是常識吧！社福界女神碧樺依（Raees）都話工作忙到唔夠瞓，但點解佢三十歲啲皮膚仍然咁好嘅？早前Raees現身公開場合，見佢個樣好似食咗防腐劑咁無乜點變，風采依然，話啱啱畢業都有人信呀！被問到有咩護膚秘方，Raees就笑笑口話冇，淨係靠飲多啲水喎，真係信不信由你。
崇尚自然唔執相
近年多個政黨主打「女神路線」，出動靚女吸納支持者，咁Raees有冇畀人招攬過？佢話多年來都冇加入過任何政黨，原因係每個政黨各有立場，所以寧願保持「自由身」去支持身邊友好嘅政界中人。咁又有冇諗過明星路呢？Raees笑住話「過咗呢個年紀喇」，又話目前已經夠忙，擔心做明星隨時捱殘個樣喎，但點睇佢都唔似碧樺「姨」囉！
擁有中巴混血美貌嘅Raees多年來對於被冠上「女神」稱號感到抗拒，難為唔少女士為求「封神」，利用修圖程式將樣貌大執。Raees話從來無裝過呢類程式，認為影相都係自然啲好，如果執到變咗另一個人，即係牽涉誠信問題喇。