政情：東西不分眾志遭網民鬧爆
由前學民思潮核心成員組成的香港眾志（眾志），成立至今四個多月以來連番甩轆，最新鮮熱辣的一宗竟然係東、西不分。話說香港眾志向港島東區居民派發區政單張的政綱部分，竟然將要求回購「西隧」錯寫為回購「東隧」，就連唔使塞車都寫錯唔「洗」塞車，隨即被網民插爆錯得離譜，質疑點解東區居民要回購西隧呢？根本完全講唔通，還炮轟眾志係咪仲以為係學生會草擬單張。
眾志尋日就東區區政單張出現訛誤發表聲明，承認將「回購西隧」誤寫為「回購東隧」，對於出現此等訛誤，他們難辭其咎，承認有不足之處，兼且向所有市民及支持者致歉。老實講，唔好一味賴手民之誤，事關呢個錯誤真係錯得離譜，尤其政府已經收回東隧的專營權，唔通眾志唔知？
解釋被指大話冚大話
雖然眾志道咗歉，但唔代表可以得到原諒，事關聲明一出，大批網民留言炮轟：「東同西你都分唔到，叫你撳『贊成』會唔會撳錯『反對』？」甚至有網民質疑「明明係東區區政單張，點會寫回購西隧？大話冚大話。」另有網民亦建議「佢哋不如出嚟做下嘢先考慮從政。」