中環出更：張德熙憶留學忘形竹戰
打麻雀係唔少港人熱愛嘅活動，金銀業貿易場日前就舉行「王者之皇慈善麻雀大賽」。金銀業貿易場監事長張德熙話，佢哋嘅康樂組過往都舉辦過唔少聯誼活動，包括足球及高爾夫球比賽，因為見港人咁鍾意打牌，所以今年就搞個麻雀大賽，點知報名非常踴躍，一開就開咗八十幾枱。
今次慈善賽以廣東牌形式進行，除咗冠亞季軍外，仲有個特別牌大獎，最先食出十三么、大四喜、清一色對對胡、純么九及天地胡嘅參賽者，均可以獲一萬元獎金。張德熙自細於鄉村地方長大，佢話啲鄉紳日日打牌，耳濡目染下都變成一分子。不過，張德熙話自己喺麻雀方面光輝史唔多，但血淚史就多喇。
話說當年張德熙留學加拿大，冬天不時零下二、三十度，咁凍冇嘢做最好就係一班人匿埋一齊打牌，有時星期五放學一打就三日兩夜，打足五十二圈，有時都會眼花花食詐胡。不過，張德熙爸爸張人龍就真係打牌高手，仲話有啲朋友開玩笑，稱佢爸爸啲子孫出世第一句識講嘅說話，應該唔係爸爸媽媽，而係「碰」喎！
陳尚智嘆打牌青黃不接
金銀業貿易場理事長陳尚智就感慨話，佢哋呢啲六、七十後非常熱愛打牌，但依家嘅年輕人娛樂太多，即使打牌都可能係用電話打，有感青黃不接，而佢平日都有大戰四方城，但礙於身份唔方便參賽，只好忍一忍手。
同場仲有香港律師會前會長王桂壎、金銀業貿易場永遠名譽會長李德麟及兒子李惟宏。李德麟及王桂壎都自言打牌唔掂，前者仲話阿仔唔會讓佢，落場無父子喎；王桂壎就話已經十幾年冇落場，光輝史就冇，仲成日食詐胡！
卓妮