呢個世界好多人講就天下無敵，之不過講完就冇咗下文。作出承諾容易，兌現承諾卻不易，政客、高官至叻承諾，而通常廢噏完就算；很多時候發生大鑊嘢，高官會見傳媒，多數拍晒心口，話如何如何改善，但十之八九不了了之。特區政府經常強調「善用機遇發展經濟」，但有嗎？老朽真係睇唔到囉！若然有，就不會回歸十九年，每年七一遊行，最多人不滿嘅就係民生問題。
被本報狠批為無心無肺無靈魂嘅特區政府，啲高官就經常廢噏當秘笈。睇吓澳門就知道，人哋博彩稅也大幅滑落啊，可澳門政府依然年年派錢，而港府坐擁金山銀山，就是甘願當守財奴，錢唔派，全民退保死都唔肯踏出第一步，而花費在假難民身上的錢每年十多億元。至於一眾高官，一係醜聞頻爆，一係臉皮特厚，有人話如果自己沒有拿這個勳章，「才可能值得你們大做文章」，這是語言上的傲慢，哪裏有半點「實事求是」的作風？
英國作家布倫吉斯所講的夫妻相處之道十大黃金法則，其中一項就是「不要讓憤怒積到明天」，無靈魂政府的施政就係廢噏多過兌現承諾，讓市民的憤怒一積積到十九年，依然氣難消，你話香港呢個福地有乜辦法唔沉淪？
「修學好古，實事求是」出自《漢書》，毛澤東於一九三八年首次提出「共產黨員應是實事求是的模範」，他認為實事求是乃「有的放矢」，當時的延安中央黨校，老毛親自提寫了「實事求是」這四個大字。而鄧小平的改革開放，實現「四個現代化」，靠的也是「實事求是」。
然而，特區政府一眾高官無視「實事求是」，一味好高騖遠，尤其前朝曾蔭權爵士好大喜功，留下爛攤子與埋下地雷，可是今屆政府並無實事求是的撥亂反正，反而添煩添亂，市民又怎能不怒火中燒？