政情：公文袋黑鑊 楊岳橋愈補愈穿
立法會上個禮拜通過二讀醫委會改革嘅《二○一六年醫生註冊（修訂）條例草案》，公民黨（公文袋）嘅投票取向「一黨三立場」，贊成、反對同棄權都有，畀網民圍攻出賣港人同病人利益，其中畀人鬧得最甘嘅楊岳橋即晚急急拍短片解畫，尋日再「補鑊」話，若果政府唔接受其黨友郭家麒嘅修正案，佢會積極發言喎！
公文袋於改革醫委會立場一時一樣，還記得郭家麒喺初期亦有重複發問兼點人數，似係同醫學界議員梁家騮聯手，圖以拉布阻礙審議進度，想拖死條草案，但經過月初流會一役後，郭家麒就收手，唔單止講明唔會點人數，仲話連佢嘅黨友都唔會阻礙草案通過，依家楊岳橋話積極發言，即係變相拉布，阻礙草案通過，咁做等同今日嘅我打倒昨日嘅我，公文袋冇黨格同黨紀又多一個例證。
贊成完又想拉布
老實講，就連拉布三子之一嘅陳偉業（大舊）都話，通過草案可改善醫委會喺處理醫療失誤個案上「醫醫相衞」嘅情況，佢唔能夠因為制度上嘅謬誤同偏袒而幫手拉布。嗱！睇清楚未，連大舊都唔拉布，楊岳橋竟然出招變相拉布，仲喺短片中話會喺三讀投反對票，仲話補鑊，穿底就真。