政情：懶足8年 忽然搏命 怪醫洗底變倒米

怪醫嘅議員生涯要由○八年於醫學界當選議員說起，佢當年作為議會新丁拍住其他四名建制派議員統稱為「五散人」，之不過佢喺首年議會生涯已經唔太積極，一○年底離開服務咗廿多年嘅威爾斯親王醫院外科部，掛牌做私人執業醫生搵真銀，一一年九月娶咗曾做過傳媒嘅太太，之後又生咗四個仔女，基於個人事業發展及養妻活兒需要，怪醫當然搵錢至上。

財會出席率低至11%

正所謂「針無兩頭利」，怪醫嘅議會工作表現每況愈下，更年復年被揭出席率偏低，長期成為「大懶蟲」之一，包括於本立法年度，怪醫於立法會大會、財務委員會等四個主要會議，出席率均敬陪末席，其中財委會的出席率低至一成一，有關情況真係慘不忍睹。

對於被指係「大懶蟲」，怪醫曾經咁樣回應：「自己只係『兼職議員』，如果唔涉及重大議題，或自己出席都唔能夠改變投票結果嘅話，則『多自己一個唔多』，寧願選擇缺席，花時間做好醫療政策研究」。言下之意，莫非怪醫認為主力係搵真銀，立法會份工只係賺外快，如果真係咁諗，認真令人側目。

重要議題立場飄忽

除此以外，怪醫於重要議題表態都極之飄忽，舉例來說，佢被外界視為建制派一員，理應跟建制派大隊支持政改方案，然而佢借勢話業界調查結果半數受訪者反對「袋住先」，與泛民廿七人站在同一陣線投下反對票，建制派則發生「等埋發叔」世紀甩轆事件，當時有傳怪醫已決定唔再尋求連任，根本做任何決定都無後顧之憂。

講番今次改革醫委會嘅草案，怪醫突然撲出嚟玩「一人拉布」，瘋狂點算法定人數將激進泛民流會「三部曲」發揮得淋漓盡致。話時話，怪醫於臨別秋波由建制派扮激進泛民，同政府玩鋪勁，究竟所為何事？有政界人士分析，怪醫以為此舉就可以抹走懶咗八年，掛住搵真銀嘅印象，就真係太天真、太傻嘞！