中環出更：港小店消失台人也嬲爆
香港特色小店漸漸消失，唔止令港人感唏噓，連台灣文化部駐港代表光華新聞文化中心主任盧健英亦深有同感。卓妮早前喺台灣婦女協會（協會）周年大會及午宴上見到盧健英，佢自言派駐香港三年多時間，鍾意探索香港大街小巷風情，尤其係社區小店，不過最近佢幫襯開嘅一啲傳統小店慢慢消失咗，覺得好激氣。
盧健英憶述，其中一間位於灣仔街市附近一間家族式經營嘅點心店，佢哋嘅食物係自製兼產量唔多，食落覺得好放心，但後來小店執咗笠，由一間規模大嘅食店取代。佢自言，社區小店做生意圖嘅係安身立命，唔係純粹搵錢，所以唔應該被趕絕。
歐陽珍盼回饋社會
著名工業家蔣震太太馬榮華、保良局前主席陳亨利太太陳趙滿菊、協會前會長曹樹華都有到場，見證協會原會長林華琴交棒畀新會長歐陽珍（Jenny）嘅時刻，其中做物流生意嘅Jenny話，任內將匯聚居港台灣女士力量，做多啲慈善回饋社會。
蔣太講起近況時話，現年九十三歲嘅蔣震仍然堅持返工，而且精神唔錯；與此同時，每年蔣家都會總動員去旅行，近年就由子女輪流咁陪蔣震去玩，首先本月先同兒子一家去玩，下月就跟女兒兼香港總商會前主席蔣麗莉（Lily）一家去海南玩。
卓妮