伊利沙伯醫院尋日公布民建聯（民記）前主席、立法會議員譚耀宗打尖進行割耳部息肉手術嘅調查報告前，有匿名者在社交網站專頁爆料，暗示其黨友陳恒鑌嘅母親獲特別照顧，涉嫌「打尖」進行換全關節手術，陳恒鑌急急撲出來，發聲名斥匿名者明顯對他作出政治抹黑。
Facebook（fb）「HA Secrets」專頁前晚有匿名者爆料，指稱「大西北眼鏡布議員」家人只需三年就能夠安排YCH（仁濟醫院）進行換全關節手術，但同醫院關節置換中心要等候相關手術起碼五至十年。
匿名者又指「大西北眼鏡布議員家人」，由門診至手術一直由指定骨科醫生同麻醉科顧問醫生負責，一般病人只係由同組不同醫生按分配負責，但陳恒鑌家人由門診至手術、康復門診都由顧問醫生負責。
其實陳恒鑌早前曾透露，其母親膝蓋退化，喺荃灣仁濟醫院排咗三年先做到手術，對照匿名者所言，應該係指陳母。
陳恒鑌發聲明指關於接連有人匿名透過社交媒體，捏造事端針對佢同佢嘅家人作失實指控，匿名者明顯針對佢作出政治抹黑，企圖誤導公眾，仲話正徵詢法律意見，唔排除採取進一步行動。佢補充，仁濟醫院屬九龍西聯網，全關節置換手術輪候時間只需三十二個月，而佢母親輪候了三十六個月，證明無打尖。明槍易擋，暗箭難防，仲要係亂箭齊發，建制派點擋呢？