政情：佔中少女迷惘過後趨溫和

曾因立場遭批鬥

今年二十一歲、喺理工大學中文及雙語系就讀嘅彭意婷（Marie）前年曾經參加過佔領行動，佢話喺佔領後感到好迷惘，覺得爭取民主唔一定要衝擊、掟磚，所以喺機緣巧合下，今年三月加入咗新思維做社區主任。

Marie話，參加佔領行動可以話係對佢嘅政治啟蒙，但之後就令佢好迷惘，仲令佢不斷諗之後可以再做啲咩爭取民主。

佢話試過喺大學參選學生會外務秘書一職，但最終落敗，之後喺理大前學生會會長、新思維秘書長黃俊瑯牽線下加入咗新思維。

後生仔通常比較血氣方剛、言行激進，Marie坦言，身邊同學多數都係本土派，當他們知道佢行中間路線時，都試過向佢「批鬥」，但佢就唔會爭辯，堅持行溫和路線。