中環出更：郭家麒爆梁家騮「實習怪醫」
立法會上周三審議改革醫務委員會嘅《醫生註冊（修訂）條例草案》時，因為醫學界議員梁家騮（怪醫）及本身係醫生嘅郭家麒拉布而流會。立法會今日會再次討論草案，問到郭家麒有咩策略，佢就話唔會拉布，更大爆一直以來都聯絡唔到怪醫，所以都評估唔到怪醫會做啲咩。不過，佢就大爆怪醫廿幾年前做實習醫生時已經係咁獨特，所以見怪不怪。
巡房永遠遲過上司
郭家麒大爆，廿多年前喺威爾斯親王醫院做醫生時，怪醫剛好係同一病房嘅實習醫生。當時醫生會按職級分時間巡房，實習醫生通常喺朝早七點半鐘巡房，而高級嘅就巡九點鐘，但作為實習醫生嘅怪醫總係遲過上司出現，郭家麒都有提過怪醫要早啲，但怪醫都係依然故我，無理到。話雖如此，怪醫仍然獲外科取錄，成為一個真正嘅醫生。
郭家麒又話，由法案委員會開始就已經提出要同怪醫傾吓，但不論電郵、電話定短訊都搵唔到怪醫，就連唔開會都冇講低。講到條草案，郭家麒認為政府已經數夠票，所以最遲本周五就可以通過，但仍然希望政府可以接受佢提出嘅修正案，否則只會令政府同醫生走向對立面。
卓妮