中環出更：與記者同樂 議員唱功得啖笑
四年一度嘅立法會議員記者同樂日尋晚舉行，議員發言就見得多，唱歌就冇幾何，但班議員唱功認真麻麻。好似議員蔣麗芸（Ann），平時把聲被批評好刺耳，但唱歌原來係超低音，惟有靠臨場爆肚改歌詞突圍而出。漁農界議員何俊賢雖然夠中氣、跟到節奏，但就忘記歌詞兼成碌木咁，冇乜台風可言。反而為大家吹色士風伴奏嘅工程界議員盧偉國先至最掂，佢唱《輪流轉》，台下個個都讚好似秋官，真係又吹得又唱得。
阿Ann尋日就孖主席曾鈺成合唱《獅子山下》，但竟然仲低音過男聲，幾乎聽唔到佢唱乜。不過，Ann突然中途改歌詞爆肚獨白話︰「我哋大家在立法會中相遇上，總算是唏噓多於歡笑」，認真唏噓。
象哥手舞足蹈放笑彈
除咗唱歌，當然唔少得議員同記者玩遊戲。話說其中一個遊戲係「有口難言」，估出最多詞語嘅隊伍勝出。議員隊負責做動作嘅進出口界議員黃定光（象哥）要扮「蠓」，於是兩手拍拍扮飛，認真趣致。到扮「李波」時，象哥畫咗個圓形，點知隊友就估係象哥，搞到全場爆笑。不過，不枉象哥咁落力，佢嘅隊友劉慧卿、葉建源同胡志偉就以估中四題，險勝只估中三題嘅記者隊。
議員成日喺會議廳吹水唔抹嘴，原來佢哋唔止吹水勁，剝花生仲叻。話說尋晚嘅遊戲「花生SHOW」，議員隊同記者隊要鬥快剝花生，喺議員楊岳橋純熟嘅手勢同利落嘅節奏帶領下，議員隊就以「二両」之差，剝贏記者隊。簡單啲講，即係記者隊尋晚兩個遊戲都全軍覆沒。議員平時被記者追訪、質問到幾乎氣都冇得抖，尋晚都算贏番啖氣喇。
卓妮