對於點樣先可以事業成功，有人話業精於勤荒於嬉，又有人話要寓工作於娛樂，先至可以提升工作動力，然後直奔成功。至於內地模特兒田孝媛就話，佢喜歡與工作談戀愛，只有愛上工作至會達至成功。
嚟自浙江杭州嘅23歲田孝媛，早喺2013年已經活躍於寫真界，不但以私模身份拍攝寫真，更經常到外地旅拍，憑住迷人樣貌同出眾身材，尤其係渾圓美股，配合性感嘅造型，令佢人氣極速上升，而佢嘅寫真集更係大尺度挑戰性感極限，成為大家嘅焦點，引起哄動。隨着人氣飆升，佢嘅工作範圍亦不斷擴展，從寫真界跨到平面媒體，喺各大潮流、化妝品及男士雜誌中亮相外，又拍過唔少廣告，另外，佢以Show Girl身份喺各類商展活動中登場。
有曾經同佢合作過嘅攝影師表示，最欣賞佢喺鏡頭前盡情釋放自己，把握機會展現美態。點解佢能夠做到呢點呢？豐富嘅工作經驗固然係其中一個原因，最重要係佢有別於一般寫真模特兒，原來畢業於專業模特兒學校嘅佢，喺投身模特兒界前，早就接受過專業嘅訓練，難怪佢面對鏡頭可以輕鬆自如，展現出最誘人一面啦！
雖然佢喺模特兒界獲得極佳成績，但佢仍然覺得自己有需要改善嘅地方。佢表示由於工作壓力相當大嘅關係，以致脾氣愈嚟愈差，因此而得失他人。幸好，佢身邊有一班坦率又有包容力嘅朋友，喺佢需要扶持嘅時候總會伸出援手，當佢做得太過火嘅時候，亦會當面指摘佢。而阿妹坦言，每次發脾氣後都會感到十分內疚。
至於感情方面，佢對男友嘅要求甚高，佢喺微博表示：「在愛情裏，男的要是一直寵着女的就能談很長時間並且感情特別好；要是女的一直忍讓男的，這段感情就不會太久。因為說句實話：女的太矯情，胡思亂想的太多，表面不說，心裏早就成一鍋湯（即憤怒嘅意思）；但最後女的都會是放棄這段感情的人，再怎麼樣也不會回頭了。」按佢嘅意思即係話，男友要識得體貼同忍讓，如果反過嚟要女友處處包容嘅話，佢覺得呢段感情一定唔會長久，換言之，佢認為男友一定要夠貼心同有足夠嘅愛。不過講真，一味要男方單方面付出，呢段感情亦唔會長久，最重要係雙方互相尊重同體諒。
簡介：其實阿妹唔單止對另一半要求高，作為專業模特兒嘅佢，對工作亦相當投入同認真，必定用心去做，而正正係呢種專業態度，令佢獲得今日嘅成績。如果大家想了解阿妹多啲，就要緊貼佢嘅微博喇，佢網名叫北海觸不到。
網址：http://www.weibo.com/u/2163846773?is_hot=1
出生地：浙江杭州
身高：168cm
三圍：33、24、35
撰文：魂