政情：調任食衞局 聶德權有排煩
改革醫務委員會法案已討論多時，能否於立法會通過將進入關鍵時刻，但政府尋日就公布現任食物及衞生局常任秘書長（衞生）袁銘輝將退休，由出任政府新聞處處長近兩年半、現年五十一歲嘅聶德權於下周三接任。政界人士分析，無論改革醫委會法案是否順利於本周通過，或延至下周才通過，聶德權都要處理落實呢個燙手山芋，大把後續工作等佢上任後跟進。
接手自願醫保計劃
至於另一個惹火議題就係自願醫保計劃，據知食衞局已對自願醫保公眾諮詢進行分析，但具體細節內容仍未全面曝光，原因有兩個，包括仍與保險業界提出嘅要求拉鋸中，其次係政府擬以行業協議方式推行醫保，被指喺多項最低要求上或牴觸競爭法。
外界一般相信，食衞局於新一屆立法會十月復會後要對自願醫保最新進度有所交代，屆時於局內負責醫療及衞生範疇嘅聶德權肯定要全力支援局長高永文做好推銷工作。至於聶德權調任後嘅政府新聞處處長空缺，政府宣布由商務及經濟發展局副秘書長（通訊及創意產業）黃智祖於下周三接任。