政情：咪兜拍照違規 梁美芬喝停
立法會最後一個會期於下月中結束，好多議員都趕尾班車帶團參觀立法會大樓。話說議員梁美芬尋日就帶領一批市民在會議廳外參觀時，不少團友對於平時用作採訪議員或官員嘅咪兜好有興趣，打算於咪兜前拍照留念，梁美芬見狀立即喝停，多次揚手勸喻眾人不要在咪兜前違規停留拍照，隨後就離開現場。不過，最少有五名團友趁機折返咪兜逐一企定定拍照。
五參觀團友懶理 折返影相
根據立法會秘書處有關使用立法會綜合大樓採訪位置嘅通告，列明只供議員、政府官員等人接受傳媒訪問，而其他人士不得使用採訪位置作任何用途，包括與議員合照或陪同議員舉行新聞簡報會或接受訪問。換言之，今次於咪兜前拍照嘅最少五名團友已違規，睇嚟梁美芬要搵多啲助理幫手睇實啲團友至得喇！