中環出更：文武廟旁動土 二帝都同意？
早前俗稱「大館」的舊中區警署已婚督察宿舍外牆先後倒塌，引起全城關注古蹟建築結構安全問題。卓妮日前見到東華三院主席馬陳家歡（Katherine），講起旗下廣華醫院重建及於上環文武廟旁將興建青年宿舍一事時，佢就話每次開展類似工程前，都會先徵求專業人士意見，確保建築物安全。咁樣喺文武廟旁動工又有冇徵求文武二帝同意？點知佢話真係有喎！
Katherine話，東華三院係一個好重視傳統文化嘅機構，好多傳統步驟都會做到足，例如每次進行基建工程或牽涉廟宇嘅大型活動前，請菩薩出巡或參與道教日活動，均會有社會服務科公共服務部負責管理廟宇嘅同事幫手「擲筊」（聖杯），問過係咪可以做先會放心去做。
咁佢怕唔怕於文武廟旁起青年宿舍會騷擾到文武二帝？Katherine就話事前已經擲筊問過文武二帝意見，所以唔擔心，而文武廟一直都有定期維修，同大館無人使用一段時間嘅情況唔一樣，加上東華三院有唔少顧問都係建築界人士，不時會就相關工程畀意見。
講起擲筊，東華三院執行總監蘇祐安就補充，如果第一次擲到「同意」就毋須再擲喇，但如果擲到「無意見」，佢哋就會重新上香敬茶敬酒，然後即日再擲，假如擲到「唔同意」，佢哋就會返去重新檢討係咪計劃出咗問題，修改後另摘吉日再擲筊，並以擲三次為上限；至於工程動工前後亦會有拜神及還神儀式，一絲不苟。
東華三院辦外訪足球交流
講開又講，東華三院嚟緊除咗同阿仙奴足球學校合作，帶一班小學生到日本進行足球友誼賽外，年底仲會帶中學生到倫敦交流，事關早前去紐約交流嘅反應非常好，學生好踴躍同開心。
卓妮