意大利地區選舉塵埃落定，千年古都羅馬誕生首名女市長，轟動國際。點解一名弱質纖纖嘅政治素人可以一舉擊敗政壇老油條呢？嗱，除咗佢係靚女，唔打得都睇得，最緊要係政綱夠吸引，淨係主張削減政客人工，選民已經拍爛手掌喇。如果香港都有呢種敢向政客既得利益開刀嘅首長，一樣大受歡迎o架。
唔係咩？立法會有名你叫垃圾會，烏煙瘴氣，七國咁亂，班政客不務正業，不孚民望，唔減薪減福利都偷笑喇，行政會議早前居然通過增加議員津貼，行政署亦正式向立法會提出撥款申請，你話係咪荒唐到極吖。唔好以為小數目喎，根據建議，下屆立法會議員嘅辦事處營運開支由現時約二百三十九萬元增至約二百五十五萬元，每名議員嘅開設辦事處及資訊科技開支更分別大增五成至三十七萬五千元及二十六萬三千元，都咪話唔嚇人。
咪畀人講中，議會政客習慣假公濟私，畀多啲津貼佢哋，咪盞畀佢哋更加肆意揮霍囉。好似資訊科技開支津貼咁，簡直淪為政客追潮流、趕時髦嘅私人小金庫，電子產品唔潮唔買，唔貴唔買，有人更誇張到買三部同一個品牌唔同款式嘅手提電腦，當正自己係潮流教主咁款，加咗津貼之後，佢哋大花筒就更加唔使肉赤喇。再唔係嘅話，就學「乳鴿」區議員咁，將用唔晒嘅辦事處營運開支攞嚟向下屬豪派花紅，慷納稅人之慨，為自己收買人心，真係幾狼都有。
你話納稅人係咪冤大頭吖，議會政客唔係收受黑金就係不務正業，唔係拉布流會就係爆粗掟嘢，唔係開會搵周公就係公然睇AV，不受懲罰反獲獎勵，咁筍嘅工去邊度搵，唔怪得次次換屆選舉都爭崩頭喇。仲有喎，立法會成日拉布流會，阻住地球轉，不過講到爭取加薪加津貼咯喎，不知幾咁高效，五分鐘就極速通過放寬申領工作開支嘅指引，唔到你唔服。
冇計喇，冤豬頭都有盟鼻菩薩，港府無能咯，立法會咪一擔擔囉。就算政客表現再不濟，民望再低落，當局一樣會為佢哋加薪加津貼，如果唔係，下次高官同行政會議成員加人工，點叫班政客開綠燈吖。所以話，咪睇行政立法惡鬥不休，建制派同反對派好似不共戴天咁，其實講到搵公帑着數，佢哋不知幾咁合拍，幾咁團結吖！
不如咁喇，如果港府真係有心「適度有為」，就主動公布所有高官減薪五成，一來為施政無能問責，向市民謝罪；二來咯喎，班厚顏政客要求自肥加薪津，都唔敢再獅子開大口吖嘛！