政情：漢奸黎退休練定坐船 學肥彭棚尾拉箱走人

漢奸黎昨日於壹傳媒旗下雜誌撰文忽然自爆要退休，話某日與太太駕車下山天色霎時黑起嚟，太太話就快落大雨，不如回頭，其後自爆返到屋企接過太太畀佢嘅咖啡，突然衝動向太太話「我要退休了」，又以天氣作比喻，「剛才滿布烏雲的天色也剛好是我的心境，那種累好像陰霾籠罩我心頭，我也要回頭了」，聲稱太太對此再不驚訝，「我順利退休了」。既然講到要「回頭」，又何必當初搞風搞雨呢?!

漢奸黎又懶有文采，自言低估今日幡然頓悟，低估自己原是福氣，高估自己先係災難，人生看不盡，事業卻有涯，而退休後會將畢生所學融入生活點滴，揚言「事業只是麵包，人生是要活着過」。

若然漢奸黎執包袱退休，真係好行夾唔送，按其過去軌迹，有機會搭船或坐遊艇離開香港，最佳印證嘅例子係前年，一批密件揭發漢奸黎於一二至一四年間曾向多名泛民議員及政黨捐款逾四千萬元後，他一度與外號「李漢奸」的民主黨創黨主席李柱銘等人，乘遊艇出海密會接近七小時，而近期佢又頻頻到西貢坐遊艇出海，話口未完，尋日又再出海喇，似乎對坐船或遊艇情有獨鍾，唔通佢練定坐船，棚尾拉箱，學當年末代港督彭定康咁執包袱後搭船離開香港？

仇家狙擊 蜂擁討債

然而時移世易，漢奸黎今次退休執包袱，予人落荒而逃嘅感覺，分分鐘會成為前年佔領行動期間翻版，再次有人挑機淋屎尿、掟豬雜，對佢最後在港時刻「贈興」。事實上，漢奸黎近期已接連被仇家上門狙擊，仇家多到連佢自己都不知邊個打邊個，相信一眾仇家知道佢退休後，會蜂擁上門討債。話時話，漢奸黎喺舊年八月一度自爆身處位於美國紐約州嘅Saranac Lake，當時形容呢個地方係湖景嘅桃花源，莫非佢早已為退休後落腳鋪路？

摺書裁員 業務虧蝕

不過，咪以為執包袱退休後就可以全身而退，漢奸黎仲有一堆「蘇州屎」要處理，就係壹傳媒旗下報紙雜誌嘅命運。據壹傳媒公布業績通告，截至今年三月底由盈轉虧，勁蝕三點二四億元，事實上，壹傳媒旗下雜誌繼續收縮，其中壹傳媒去年將《壹週刊》、《飲食男女》和《ME！》合併發售，今年二月公布娛樂雜誌《FACE》印刷版三月停刊。另外《壹週刊》、《飲食男女》和《ME！》曾重組架構，裁減人手逾一百人，《ME！》更喺上月「摺書」收場。

漢奸黎除咗處理旗下媒體業務外，最重要係喺前年佔領行動涉嫌組織及參與非法集結兩項罪名，警方有機會再拘捕他，只係未知幾時落鑊，即使佢想借退休為名拍拍屁股走人，但相信去到邊仍係「戴罪之身」，籠罩住佢心頭嘅陰霾始終不散，事到如今，恐怕已經回頭太難喇！