中環出更：嫻姐「炒冷飯」 倡打造潮州街
立法會議員陳婉嫻早兩年提過想喺九龍城打造一條潮州街，結集該區潮州特色食肆、糕點及雜貨店等，希望推動特色街頭經濟，將九龍城變為本地一個深度遊嘅景點。不過，嫻姐前年九月已經同商務及經濟發展局局長蘇錦樑去過一次實地視察，但至今了無寸進，唔知係咪因為咁，嫻姐就一於「炒冷飯」，尋日拉埋唔多關事嘅食物及衞生局局長高永文再行一次。
嫻姐同高永文、九龍城區議會主席潘國華、潮州文化研究專家許百堅等一行人齊齊到九龍城考察一批小商戶嘅經營情況，探討重建九龍城街市嘅可行性。本身係潮州人嘅高永文梗係趁呢個機會介紹吓家鄉特色嘢啦，講到潮州美食時更如數家珍。
冀保留傳統文化
嫻姐話，九龍城區近年唔少地方陸續被發展商收購，希望呢類潮州傳統文化可保存。高永文就話好欣賞呢個建議，但坦言實際有難度喎，希望有關專家整合一個清單，記低邊啲係九龍城現有特色，邊啲需要引入等，再具體分析重建嘅難處及機遇。聽佢咁講，睇怕拖多三五七年都未能成事喇！
卓妮