中環出更：英公投脫歐 議員論得失
英國舉行脫歐公投在即，結果唔止對英國本身，就算對全球市場亦有影響，而立法會議員對此意見分歧。紡織及製衣界議員鍾國斌（Felix）就話，雖然佢個女喺英國留學，英國脫歐或會令英鎊貶值，但佢就支持留歐，因為做生意會比較方便。不過，議員陳偉業（大舊）就高呼︰「大財團支持嘅我必反對」，認為近日唔少大財團表明反對脫歐，所以佢就支持脫歐，真係貫徹其包拗頸作風。
Felix話，佢個女喺英國留學，每年學費要一萬五千英鎊，連同生活費就要三萬英鎊，佢一向都有買開英鎊交學費。佢估計，如果英國成功脫歐，英鎊會跌價，專家估計會跌兩成。雖然脫歐會令學費平咗，但佢都係支持留歐。做服裝生意嘅Felix就解釋︰「依家啲貨去到英國，已經係去到歐洲，佢哋自己分發，如果脫歐，英國唔屬於歐洲，可能要畀重稅。」
會計界議員梁繼昌就坦言，佢個女都喺英國讀書，如果英國脫歐成功，學費負擔會減輕，估計最多可以慳一成至一成半。但佢就覺得脫歐嘅機會好細，因為英國人會考慮脫歐對英國國力、外交、經濟等影響。雖然英國依家處於歐盟，但仍有好大自由度，好多方面都未必跟隨歐盟做法。
大舊反財團包拗頸
議員梁美芬就話，佢個細仔就嚟讀大學，都揀緊去美國定歐洲。佢認為，唔少香港人對英國有情意結，而英國就為港人打開歐洲之門，如果英國脫歐，香港會有損失。至於大舊就貫徹包拗頸作風，本來佢認為英國嘅事應該由英國人自己解決，佢冇意見，但近日見到唔少大財團表態反對脫歐，財團反對嘅必定對勞工有利，所以佢會支持脫歐。
卓妮