政情：公民講場：「細口仔」仲廢 高永文閉翳

環境局局長黃錦星（星星）力推源頭減廢，而為咗配合稍後推出嘅家居固體廢物徵費，食物及衞生局局長轄下嘅食物及環境衞生署尋日開始逐步換上「細口仔」新垃圾桶，期望令市民減少將大型垃圾放入垃圾桶。不過，有環團就鬧爆政府冇宣傳「細口仔」新垃圾桶同徵費有乜關連，市民見啲大型垃圾塞唔入就索性放喺垃圾桶旁邊，咁樣肯定增加清潔工人嘅工作量，而食環署係咪夠人手執法亦存疑，倒頭嚟減廢變咗增廢，街道愈嚟愈污糟，唔單止係添煩添亂，簡直係本末倒置，高永文呢次真係畀星星嘅屎橋跣鑊甘！