政情：林博林作屢被誤當兄弟
政圈中唔少人嘅姓名只有一字之差，好似建築、測量及都市規劃界議員謝偉銓同獨立議員謝偉俊，二人一度畀人誤以為兩兄弟。政界最近亦多咗對「兄弟」，佢哋就係九龍城區議員林博，以及大律師兼「港姐男友」林作。林博尋日自爆，至今已有十名街坊問及佢哋兩個係咪兄弟，亦有街坊問佢女朋友係咪港姐，佢自言，每次都好直接咁答，佢哋兩個人之間無任何關係，唔知街坊聽完之後有冇小小失望呢？
除此以外，林作同林博嘅出身亦大不同。林博透露，自己係讀旅遊科出身，畢業後喺機緣巧合下開展社區工作，而作為區議員新丁，佢自言兩部手提電話都係廿四小時長開，試過有街坊凌晨兩、三點打電話嚟問嘢，佢一律照聽，事關唔怕一萬，最怕萬一，如果有意外發生都可以即時知道喎。
