建制及泛民黨派均會諗盡辦法去爭取資源，適逢政府預留五億元成立創科生活基金，有泛民議員就喺立法會一個會議上，要求當局講明係咪政黨或曾支持某候選人嘅機構都唔可以申請基金，創科局表明盡量唔會接受政黨申請。換言之，各大政黨唔使旨意打基金嘅主意嘞！
立法會資訊科技及廣播事務委員會尋日開會，其中一項議程係創科生活基金，泛民議員陳志全稱，希望研發手機應用程式打擊種票；資訊科技界議員莫乃光則質疑，每個項目可獲最高五百萬元資助上限係咪太高，擔心有非政府機構將開支作到好大，甚至產生利益輸送之嫌，反建議資助上限為二百至三百萬元就足夠。
創新及科技局局長楊偉雄回應指，基金屬於「本地創新、本地應用、本地受惠」，政府亦容許將外國研發成果本土化；創科局常任秘書長卓永興補充，基金唔會作政治審查，但盡量唔會接受政黨申請。