政情：建制泛民圍剿吳得掂

泛民揚言不惜代價拉布

喺尋日召開嘅立法會教育事務委員會會議，班議員對準教育局局長吳克儉（吳得掂）連環發炮。人民力量陳志全表明會不惜代價阻擋，反對到底，因為教育局違反早前定下嘅「民生行先、先易後難」原則，即係向立法會宣戰。佢揚言局方若未於周五前表明，會否將項目交予財委會審議，就會提早喺周五拉布，毋須等獎學金審議。民主黨嘅黃碧雲亦批評吳得掂「手指拗出唔拗入」。獨立泛民黃毓民表明，項目一旦到財委會就會「拉到天昏地暗……黃泉路就有一條」。

一向同吳得掂有牙齒印嘅委員會主席林大輝就諷刺佢，「唔懷疑（吳得掂）對一帶一路熟悉，你鍾意旅遊、又睇好多書」，跟住又話市民對呢方面感到陌生，對呢個建議亦有濃厚負面印象，認為有政治目的多過教育效益，而除咗新加坡之外，其他國家學科水平、認受性等都係一無所知，直言佢係「堅離地」。

建制派方面，民建聯嘅李慧琼亦坦言立法會對此有很大爭議及保留，現時離休會只剩低好少時間，加上換屆選舉臨近，議員都會表達政治立場，認為政府應先用內部資源調撥，進行部分項目，若然教育局要闖關，亦希望將項目「排最尾啦」。

吳：未決定交財會安排

委員會及後加時十五分鐘，仍未能處理泛民三名議員提出反對獎學金議案，多名建制派反對再加會，會議就此結束，似乎係擔心建制派唔夠人反對，同埋擔心要表態。

教育事務委員會喺七月二日會繼續審議相關議題，而政府理論上亦可直接將撥款議案提交財委會。被狂轟後嘅吳得掂就喺會後話會綜合意見考慮，但未決定提交財委會安排，睇嚟佢都知冇咁易過關。