中環出更：肥佬黎急會三老鴿謀後路
壹傳媒集團前主席黎智英（肥佬黎）尋晚又再密會攪局！還記得五名疑似內地男子前日出現於黎宅附近，並拍攝其門口作記錄。事隔一日多時間，肥佬黎尋晚同白鴿黨三名老鴿，分別係外號「李漢奸」嘅白鴿黨創黨主席李柱銘、白鴿黨前主席何俊仁（AV仁）及李永達密會，莫非有人思前想後，擔心前日現身嘅數名男子係來自內地「強力部門」或係廉署人員，因此騰騰震搵人傾偈諗定出路？
五漢拍門翌日 密晤三粒鐘攪局
尋晚六時半左右，肥佬黎名下嘅七人座駕接載三名老鴿李漢奸、AV仁及李永達到肥佬黎位於何文田嘅寓所密會，不過今次三名老鴿一反過去於黎宅停車場下車，然後步行至黎宅內嘅做法，今次該部七人車嘅窗簾一早拉上，一直駛至黎宅嘅大門前才停下，李漢奸等三名老鴿隨即急急腳走落車入內，最終肥佬黎與三名老鴿密會近三小時，三名老鴿才於晚上九時廿分齊齊離開。
肥佬黎今次同三名老鴿密會嘅時間，認真耐人尋味，除咗撞啱前日有五名疑似內地男子於黎宅附近現身拍攝，有人唔知係咪因而騰騰震，要搵人傾偈了解事件虛實；另一邊廂，上周六爆出財政司司長曾俊華同白鴿黨老鴿於香港會密會疑雲，巧合地同今次黎宅密會嘅白鴿黨老鴿人選一樣，難道有人要親自匯報密會成果？
卓妮