中環出更：為治病母 李小羿開藥廠
每個人於某一行業發展都有其故事，身兼科大理學院兼任教授嘅李氏大藥廠創辦人李小羿都唔例外。佢透露，當年決定創業開藥廠，主因係母親患癌，當時從事藥理研究感覺束手無策；另有商界中人鼓勵更多年輕人創業，從而學懂如何向自己問責嘅自強觀念。
科技大學尋日舉行榮譽大學院士頒授典禮，其中有四名政商界人士獲頒榮譽大學院士，包括李小羿、珠寶連鎖店創辦人馬墉傑、企業家黃達琛等，同場出席活動仲有科大副校長翁以登、九龍樂善堂主席施家殷等人。
馬墉傑鼓勵年輕人創業
其中李小羿在太太及兩名女兒見證下獲取榮譽，講及開藥廠嘅點滴，李小羿話近年都比較着眼於內地市場，原因係內地改革開放後，市民嘅飲食習慣都同以前唔同咗，舉例指由營養不足變為營養過剩。佢相信，其實人類嘅基因同生活環境係相輔相成，換言之，當身體基因適應咗後，生活環境突變就會令基因適應唔到而發病。
同場嘅馬墉傑好重視本港青年嘅創業精神，指依家港人偏向保守安逸，常旨意政府幫助，社會上更瀰漫「隱善揚惡」風氣。因此，佢同子女共同創辦協助年輕人創業嘅組織，提供共用工作空間，佢相信港人若勇於創業，將可培養自我問責嘅觀念。
黃達琛則談及樓市最新情況，形容賣樓同賣麵包一樣，都係趁新鮮熱辣時賣出去，然後再搵地起樓賣出去。佢仲話，依家發展商向買家提供優惠，只係營銷手法，唔係睇淡樓市。
卓妮