有個笑話係咁嘅。政客不慎墮海，被三名青年救起，政客許以三個願望。第一個答想入西點軍校；第二個答想入哈佛大學；而第三個就答想葬喺國家公墓，政客搲晒頭，對方解釋，如果畀老竇知道我救咗你，殺死我都似。
呢嗱，立法會換屆選舉話咁快就到，鐵定七月提名，九月四號正式埋牙。試諗下，一個政客已經夠乞人憎，立法會七十席，假設三個人爭一個位，大大話話都有二百幾個政客輪番獻世，選舉期間嘈餐飽已經夠煩，選完之後入局，仲要嘈多四年，肯定更加惡頂。
冇錯嘞，有名你叫垃圾會，班議員出名有破壞冇建設，拉布流會當食生菜，阻住地球轉。即使唔拉布嘅都係不務正業，三點不露，瞌眼瞓，睇艷照……醜態畢露，咁都算嘞，最離譜係有政客收取黑金，自己友仲要玩包庇護短，聽講部分人嚟緊會爭取連任，繼續禍港殃民，問你點頂。仲有吖，咪睇班議員平時懶到出汁，講到攞着數鬼打都冇咁精神，本地「考察」行程拍烏蠅，歐美豪華團次次爭崩頭；爭取加薪加津貼更加係萬眾一心，從來冇話拉布流會，議事效率直頭係世界一流。
可能有人會話，市民捱咗四年，家陣終於捱到換屆，vote them out咪得囉。嘥氣喇，政客一蟹不如一蟹，以前就話「君子動口不動手」，最多掟下雜物啫，家陣社會愈來愈激，下一屆立法會只會更加烏煙瘴氣，分分鐘將磚頭、燃燒彈掟入議會，搞出人命都似。唔怪得愈來愈多市民選擇用腳投票，移民美加澳又好，移民台灣又好，移民瓦努阿圖都好，總之冇眼屎乾淨盲。
冇條件移民，班政棍又撐唔落，咁點算好？計功夫茶話齋，不妨將信任一票投畀社會第四權嘅傳媒。大家有眼見，無論係假難民禍港，民航處大花筒醜聞，抑或高官僭建霸地，次次都係傳媒踢爆，官老爺至急急補鑊。當然喇，除咗立法會爛到入心，行政同司法亦唔好得幾多。呢頭港府吹噓「十大基建」可以協助建造業工人就業，嗰頭垃圾會玩拉布，搞到工人冇啖好食；呢頭港府話要對佔中亂港分子「依法辦事」，嗰頭「警察捉人，司法放人」，幕後黑手毛都冇少一條，「三權分立，互相制衡」淪為「三權皆廢，互相拆台」，簡直吹脹。你話嘞，成個社會紛紛擾擾，無日安寧，冇正義傳媒看門口點掂吖！
始終都係美國前總統杰弗遜講得啱，報紙政府二擇其一，寧要報紙不要政府。至於垃圾會，送去堆填區都嫌費事，不如索性摺埋佢，幫納稅人慳番筆之餘，市民又可以耳根清淨，何樂而不為！