醫護人手不足係香港公營醫療系統長期面對嘅難題，食物及衞生局副局長陳肇始尋日接受電台訪問時話，當局會研究聘請退休護士「帶教」，即係由退休護士指導一啲年資較淺嘅護士，以紓緩資深護士壓力，畀資深護士可以照顧病人，處理病房事務，提升整體護理質素。不過，衞生服務界立法會議員李國麟就話，其實佢幾年前已經要求醫院管理局聘請退休護士臨床「帶教」，但政府竟然依家先話研究呢個建議，直言感到好失望。當局喺籠底搵番啲舊橋出來當新嘢，又再反映呢個政府係幾咁後知後覺喇！
