政情：復修大館 丁新豹憂損風貌
有逾一百年歷史、被列為香港法定古蹟嘅中環荷李活道舊中區警署已婚督察宿舍（宿舍），原本正進行活化工程，但上月底就有外牆倒塌，搞到活化變冧樓。同中區警署都有「淵源」嘅香港歷史博物館前總館長丁新豹都大嘆可惜，又擔心就算再修復，都會影響宿舍嘅歷史價值。
難再用原有物料修復
丁新豹曾主編《香港歷史散步》一書，當中都有介紹舊中區警署。對於宿舍外牆倒塌，佢就話自己雖然唔係歷史建築物復修工作方面嘅專家，但以佢嘅了解，宿舍歷史隨時耐過舊中區警署。佢又話，宿舍嘅磚已經好脆弱，但負責復修工作嘅有關方面可能都想用番相同物料嘅磚進行復修，但最後因為唔夠力承受，結果發生倒塌。
古蹟活化好多時都會想保留歷史建築嘅原來風貌，但丁新豹估計，如果宿舍再復修，都應該唔可以用番相同物料，如果用唔同物料，就會影響宿舍嘅歷史價值，雖然咁樣係好可惜，但都無辦法喇。