政情：陳岳鵬「工作狂」 無暇識女仔
官場中嘅「王老五」已買少見少，但政制及內地事務局副局長陳岳鵬（Ronald）至今仍然唔知情歸何處。早前卓妮喺一個活動上見到Ronald來去匆匆，好似好趕時間咁，佢話近期非常忙碌，笑言投放咗九成時間落工作，問到仲有無時間識女仔呢？佢就話過埋今屆政府先再諗喎！話口未完，局長譚志源前日端午節已開始放大假十七日，呢段時間就要Ronald署任局長，真係想得閒都幾難。
靠游水睇戲減壓
都市人工作繁忙，真係最緊要識得減壓。Ronald話會透過游水減壓，但就唔係用游咗幾多個塘計算，而係計時間，最理想係一個星期抽到一至兩日游水，仲要一口氣游到四十五分鐘添。除咗游水，Ronald都鍾意睇戲，但問到上次睇咩戲時，佢就支支吾吾咗好耐，然後先答到係大約半年前嘅港產片，至於再對上一次睇咩戲就更加唔使講喇。其實睇戲都係休閒活動，咁都要諗咁耐，唔通佢睇嘅戲係唔講得出口嘅？