中環出更：炎夏抗熱浪 名媛騷旗袍
炎炎夏日即將殺到，出席正式場合又唔想熱辣辣，應該着咩衫好？旗袍可能係一個好選擇。本地設計師蔡毅明早前舉辦一場旗袍時裝騷，好多名人都有出席，當中唔少更係旗袍愛好者，好似灣仔區議員伍婉婷及金紫荊女企業家協會主席彭芷君咁，都不時着旗袍出席大小活動，連襯衫嘅時間都慳番唔少。
近年旗袍愈出愈多款，唔單止物料多元化，睇落仲唔老土，好似蔡毅明就靠蕾絲款嘅旗袍成功打出名堂，俘虜唔少愛靚名媛嘅心。伍婉婷話，除咗每年正月會整個月着住旗袍出席活動應節之外，平日出席活動都特別鍾意以旗袍示人，一來可以保存傳統文化，二來方便又端莊，佢屋企就收埋咗起碼三十襲旗袍。旗袍仲有一個功能就係凸顯女性體態，難怪佢着起旗袍感覺瘦啲喇。
盼令旗袍更時尚年輕
當日出席嘅仲有裕華國貨董事總監余偉傑、本地著名時裝設計師郭翠華、長衫薈顧問李惠玲、召集人曾舜恩、張黃穎恩及成員陳淑芝等，其中陳淑芝仲將旗袍上的盤扣換成淺藍色透明鈕扣，睇落更添時尚感，一班長衫薈成員更異口同聲話希望推動旗袍便服化，令其更時尚及年輕。
同場仲有東華三院前主席梁定宇，見佢曬到一身健康膚色，皆因佢近年熱衷水上運動，仲有教人駕駛快艇同遊艇添！佢話香港難得有咁靚嘅海，但市民嘅海上知識卻相比其他沿海城市低，好多人仲唔識游水，所以佢好高興阿仔依家都積極學扒艇仔，除咗一齊享受大自然樂趣，仲可以提升阿仔嘅解難及獨立能力。
卓妮