青少年犯罪問題愈來愈多，手法愈來愈兇殘暴戾，有人弒父殺母，有人肢解女友，有人石棺藏屍，真係幾恐怖都有。家陣大家終於知點解咯，港府把關粗疏，坐視血腥色情書籍通街賣，青少年心靈備受荼毒咯喎，想唔出事都難喇。
最近引起恐慌嘅兩本血腥書就係典型例子，內容衝擊人倫道德底線，又性虐，又殺人，又烹屍，一睇就有問題，點知電影、報刊及物品管理辦事處舊年收到投訴時居然話冇問題，任由喺未有膠袋及任何警告字句下通街賣，你話係咪靠害吖？直到近日投訴不絕，群情洶湧，電報辦至急急補鑊送交淫審處評級，結果暫列為第二類不雅物品，電報辦等如被摑咗一巴。
所以話，不良出版物荼毒心靈，為禍社會，港產官僚係罪魁禍首。平時懶於巡查，血腥書成為漏網之魚，本來已經抵鬧，收到市民投訴仲要敷衍塞責，更係罪加一等。唔使問阿貴，電報辦官僚根本冇認真睇過呢兩本書，隨口噏當秘笈，求求其其過一日，把關懶散成咁，你話係咪害人不淺吖。呢兩本書能夠登上暢銷榜，成為「超人氣書籍」，即係代表好多人睇過，萬一有人有樣學樣，做出泯滅人性嘅事情，失職官僚切腹謝罪都唔掂吖。
咪以為淨係電報辦至有問題吖，淫審處嘅暫定評級一樣引起爭議。正如色情及不雅刊物審裁員協會主席葉興國話齋，呢兩本書內容變態畸形，應該被評為第三類淫褻至啱，家陣淫審處從「輕」發落，同放生冇乜分別嘅咋。仲有吖，現時法例被指對違例者嘅罰則過輕，以今年嘅個案為例，涉事出版機構只被罰款八百至六千元了事，同賣書利潤根本不成比例，阻嚇力細成咁，到底係懲罰違法者，定係鼓勵違法者，已經不言而喻，唔怪得有人有恃無恐喇。
講到呢度，大家應該知道點解世風日下，人心不古，成個淫審制度及把關架構千瘡百孔，社會唔烏煙瘴氣至奇。最不可思議嘅係，淫審制度親疏有別，當局應做嘅唔做，不應做嘅又無事生非，壹淫媒誨淫誨盜，互聯網色情氾濫，變態出版物教壞細路，佢哋隻眼開隻眼閉，但係對正義傳媒就不斷打壓，連國際藝術作品「大衞像」都被視為不雅，甚至爆出三重標準嘅鬧劇添，淫審制度淪為政治工具，最不雅應該包膠套嘅梗係淫審官僚喇。
古人話，教化者朝廷之先務，廉恥者士人之美節，風俗者天下之大事。港產官僚唔係教化社會，而係得過且過，暴力不雅出版物任睇唔嬲，你話佢哋唔係變態都冇人信喇！