政情：公民講場：馬時亨論票價 「跟住矛盾去開會」

潮流興跟住矛盾去旅行，估唔到港鐵主席馬時亨升級到要跟住矛盾去開會。話說尋日港鐵舉行股東周年大會，會上當然離不開加價議題啦，其中一位小股東發言時要求港鐵帶頭減價，唔好年年加價，因為年輕人坐港鐵好貴。馬時亨就話，一間上市公司好難解決民生議題，如果減票價，利潤會減少，咁股息都會減少，所以大家係咪要「跟住矛盾去開會」呢？其實港鐵作為上市公司，真係好難同時滿足股東及市民大眾嘅期望，所以點樣平衡利益真係好考功夫。