政情：有相為證：卿姐攔途申訴張炳良少理
立法會財務委員會原定安排本周六加開會議，但前日秘書處就通知議員，因為審議進度良好而取消加會。議員劉慧卿（卿姐）尋日就大鬧有關安排，話政府如果着緊項目審批進度，就應該繼續安排議程開會，唔應該令會議「斷纜」，形容政府一方面話議員阻礙審議進度，但又唔安排好議程，怒斥政府「好過分」囉！
卿姐表達完意見，剛好見到運輸及房屋局局長張炳良路過，於是立即捉住張炳良，好肉緊話唔應該取消財委會，張炳良回應話「唔關我事」，跟住就去開會。財委會主席陳健波解釋，明日財委會已經可以完成審議六個項目，所以取消周六嘅特別會議。佢又話，工務小組通過項目後，要幾個星期嘅程序才可交上財委會審議，以致出現今次排唔切議程嘅情況。