政情：羅冠聰 周庭 自晒酒店床照
網上流出香港眾志主席羅冠聰與副秘書長周庭酒店開房及床上照！香港眾志尋日在社交網站facebook（fb）爆料，還上載了一段訪問片段，片段中見到羅冠聰與周庭及另一男成員身處酒店房內，三人均坐在床上，究竟搞咩呢？原來佢哋為咗準備翌日近距離向國家領導人示威嘅行動，周庭仲話未知警方嘅布防，所以未決定示威方式，一切要視乎現場情況，好似望天打卦咁款。
佢哋喺fb話，早前在網上花費約三千元預訂本月十六至十八日共兩晚酒店住宿，在十六日當晚先搵生面孔嘅朋友到酒店櫃台辦理入住手續，再從友人手中接過房間匙卡後，羅冠聰、周庭及另一名成員戴帽，垂下頭急步走向大堂升降機，再直接上房。
何解要採取如此迂迴嘅開房方法？當然係怕風聲敗露後被趕出酒店，令示威行動「泡湯」。話說香港眾志嘅前身學民思潮，其三名生面孔成員曾於一四年九月入住酒店，有成員更手持抗議標語走到酒店大堂，結果被酒店保安抬走，並警告佢哋唔好再返回酒店。不過，如今佢哋咁樣事先張揚，唔怕「泡湯」收場咩？