政情：退休提臭史 羅崇文無悔意

立會曾強烈譴責痛斥

羅崇文今日起就會展開退休前休假，由李天柱接任處長一職。佢以英文撰寫退休宣言，話自己加入航空界四十年，係時候休息一下，日後可能會做一啲與天空無關嘅事。不過，佢特別提及十二年處長生涯，最大挑戰就係新總部大樓同新空管系統。

相信廣大市民應該唔會忘記，羅崇文在任期間多次被爆出醜聞，包括喺民航處新總部大樓內設置大量淋浴間、大電視同跳舞房等不必要設備，成個總部十足豪華娛樂場，立法會政府帳目委員會報告曾經用「強烈譴責及痛斥」等歷來最嚴厲字眼，批評羅崇文嘅表現。至於新空管系統甩甩漏漏，不但延誤啟用接近四年，仲要分階段使用，令人擔心航空安全，萬一不幸發生空中事故，真係不堪設想，難為佢仲敢向下屬重提臭史，真係毫無悔意。

借同事把口自吹自擂

羅崇文喺宣言中仲引用另一位已退休同事嘅說話，聲稱「我哋」已經為航空界鋪好穩固、持久嘅基礎，唔知民航處班員工睇完宣言後係咪要講聲「多謝處長」呢？難為羅崇文最後仲留低咗自己嘅手機號碼畀同事，希望保持聯絡喎，真係「好行夾唔送」！

其實喺本月初，政府發出有關羅崇文退休嘅新聞稿，公務員事務局已經好頭痛，因為擔心表揚佢會令政府被各界質疑護短，如果全盤否定佢多年嘅工作又好似太不近人情，結果只能夠寫佢「積極參與發展香港成為一個國際航空中心及空運物流樞紐」，以及祝佢「退休生活健康愉快」，隻字不提佢任內有何貢獻。所以話呢，架係自己丟嘅，既然臭史一籮籮，執包袱就不如繼續臭史密冚算啦！